Wis 19

Iyibi wali agali mini lulu anda heagola mo ko henego ogo

1 Í̠naga miniha tandaga holene biago ereba nahe wiaho wialu wali agali ko biaga hearu tigua mani ogoale bule ka lo manda biriru bo amo lariya. 2 Tigua í̠naga wali agali ala pudaba lalu bo daila hayagoyu mani tinaga mini beregedalu talima mama puwa bolobada lo manda biriya. 3 Ainde tinaga waneigini homayarunaga homalini dugu bialu heyu howa ainde tigua lone lulu mini mbira wiyiya. Pigane howa tigua lalu, Ngode Datagaliwabenaga wali agali dindi ti henedago wahalu pudaba, lalu bi hongohe layago lowa peaha tigua talima pialu lone haru halu dai bule pene. 4 Tiha mo ko timbuniore hene. Anidagua biyagome mbirale tiha tagira ibiyaru mo embeda hene. Ani bialu ti tandaga tara tarabi genda tara tarabi handa nabi dege hayago ai uruni áyu ngola hayagola ti mo ko howa bai hene. 5 Wali agali ko uruni ti homolene hariga tara tarani ko tara tara ngagoria homai holebira. Anigo ainde í̠naga wali agali ti hariga tara mbiraha yupe halu piya.

Ngode Datagaliwabehanda ibunaga wali agali mo tiga bialu haru henego ogo

6 Í̠naga waneigini bu hearu mo ko nahelonaga í̠na bi larigola dindi ogoria mo ko hagane tara tara wiarunaga hongo iriari biya. 7 Tigua handalu hearia tinaga balai anda bu heagoha ginu haguame ge hai heago handalu dindi abale ibame namulai ho wiaria hendenego ai dindi pana halu yobi iba nabere wiaria hendene. Ani bialu hariga tigabiore iba solowara mini Iba Daramabi laga bereago hanuni pearia hendene. Abale dindi mbira iba solowara birame hearia hendenego ai ogoriani dataniru andaho hearia hendene. 8 Í̠naga wali agali tigua mbirale nahendene ale tara timbuni uruni hondowa miniha mogolo hene. Í̠na ti baya hangu handaya ho heagola ti bayale pialu iba ange mendehayagi ubaede hai hene. 9 Tigua turu howa nogo hosime gerai ibaga biagadagua bialu nogo sibi iginime porabu dagadaga bialu te biagadagua bialu hene. Í̠na ti anidagua biamogo birigola tigua Anduane Homogo í̠naga mini yaraga halu iba gana lalu hene. 10 Tigua mbirale mbirale dindi tarani hemigoha bini wiaru bibahende manda biai hene. Ainde dindime bulumagabi marualebi anda ho helo mondo bialu wia nabi hinabibi hangu mondo biniya. Ibame nde wenaru mondo bialu wia nabi iba yago biru wiaru dege magu taguatagi haya. 11 Ainde í̠naga wali agali ti tomo bayaleru noa ho heagola nde mana gahenge tarale mbira handa walia haya. 12 Tinaga hina gari timbuni wiago biba helonaga ega biaru iba solowara beregoha howa tagira ibiyaria hendene.

Ngode Datagaliwabehanda Iyibi pani nelo minigo ogo

13 Manane tara tara harini haya. Ngode Datagaliwabehanda wali agalime ko tara tara bialu hayagonaga pani nelo mulene tigabi ngadagua mulenaga harime kulukala lalu hari dabame mo walia haya. Ti pani nelo mulubadagoni irane tigua wali agali tara bu hearuhondo mana ko bialu hayagonaga nelo mulebira. 14 Wali agali tara uruni tini dalu wahalu dindi tara wiagoha ibu hearia wali agali dindi aba hearume tinaga dindini helo hame nale hene. Ani bialu wali agali tara dege halu mende dindi ogoniha íbu henego ainde dindi aba hayadaru tigua wali agali tara urunime tihondo bayale bialu hayago mitangi nabi hene. Tigua wali agali tara uruni tinaga garabaya biabe ale bialu helo helene. 15 Heneneore wali agali dindi anduane uruni tigua wali agali tara uruni turu nahe howa tinaga dindiha helo hame nale hene. Wali agali mana ogonidagua bialu hayaru ti yolo ko wiaru mini. 16 Ai wali agali halu mende ti daluha haru hene biaru baba tomo bayale timbuniore dawa nalu mali lialu iba ganaru lalu turu howa tinaga dameneore haru haradagua haru hene. Ani howa mani tigua wali agali tara turu howa haru hayaru lone garabaya hai helene. 17 Ngode Datagaliwabehanda tinaga de mo ndibulo heleagola ti de nahe Sodomo wali agali henegobi dege hene. Sodomo wali agalime wali agali tigabi hearunaga panga haraba wiago handabe nahe hene. Ainde wali agali ko uruni Sodomo wali agali henegobi dege hene. Ti aruma timbuniore heagoha howa bibahendeoreme tinaga anda panga taya bialu hene.

Ngode Datagaliwabenaga hongo timbuni ngago ogo

18 Ainde ngida tara tara ngaru tinaga pu dewa hibu howa agali ngida bagame balu howa bi tara tara mo lela halu bagane nga. Bamba manane ogonibi dindini mbirale tara tara wiaruha tagira ibini. Mana dindini bialu haga wiago bibahende iriari bialu ai mana gahenge tagira íbu nga. Iname mbirale ala wini ngaru baya hangu manda biai harimayagua nde áyu iriari dewaore bidane hondoleberema.

19 Ainde ema bialu piaga irabuha biragaru andaga biru aribia halu ibaha biragaru dindini bira aribia halu dindiha biragaru ibaha biru aribia haga bini. 20 Ira iba andaneha dalu kagoyu hundia nabiagaya. Ai iba ibu mo beregdalu ibunaga hongo ira ba hundia haga wiago wahaya. 21 Abale irame mbirale ibu dedagoha anda porago bibahende dai hagago ainde áyu ogoningi irame nadayagola ema bialu piaga uruni nahomaya. Ai tomo dahuliya anda howa ibiniyago dindi guni aleya. Anigo ainde iranaga hongome tomo ogoni mo iba habe naheya.

Bi lamaro binigo ogo

22 Anduane Homogo-o bibahende ngaru togoni howa í̠naga wali agali bu karunaga mini yaraga hagaya. Í̠na ti horo mbirangi yu wahene nawiore. Bibahendengi dindi bibahendeha í̠na ti biamogo bialu haabo hagaya.